Omumbowa wa Kabaka ow’ennono omukulu ayanjuddwa eri minisita w’Obuwangwa, Obulambuzi, Embiri n’Ebyokwerinda mu Bwakabaka, ng’ono aweebwa ekitiibwa eky’obwampinga.

Patrick Ssemakula (Mpinga), yaayanjuliddwa bajjajjaabe ab’Olugave, okutandika okuweereza oluvannyuma lw’okukolwako emikolo gyonna egimufuula omumbowa omukulu mu Lubiri.

Oweek. Male amwanirizza n’amusaba okuzzaawo ekitongole ky’abambowa ng’eggye erikuuma Kabaka, n’okulaba nga embiri n’amasiro byonna biriko abambowa nga bakolera wamu n’ab’ebyokwerinda.

Ssemakula ayanjuddwa ow’essiga Kasoma Nakatanza, Omutaka Kiwutta Stephen, nga awerekeddwako ne Katikkiro w’ekika, Natiigo, Godfrey Katende ku lw’Omutaka Ndugwa. Yeeyamye okuweereza n’obumalirivu.